پێش به‌ بریاری سه‌نگسار بگرین!

خه‌ڵکی ئازادی خوازی کوردستان،

ژنان و پیاوانی تێکۆشه‌ر،

کۆماری ئیسلامی ئێران‌ بڕیاری سه‌نگسار کردنی 9 ژن و 2 پیاوی داوه‌. ئه‌وه‌ یه‌که‌م جار نیه‌ که‌ له‌ ئێرانی ژێر ده‌سه‌ڵاتی کۆماری ئیسلامی‌دا بڕیاری سه‌نگسار ده‌ر‌ده‌چێ و ژنان و پیاوان به‌ تاوانی ڕابیته‌ی جینسی به‌ بێڕه‌حمانه‌ترین شێوه‌ و به‌ به‌رد پێدادان ده‌کوژرین.

ئه‌م دیارده‌یه‌ که‌ له‌ سه‌رچاوه‌کانی ئایینی ئیسلامه‌وه‌ هاتوه‌ به‌ ده‌ستی کار به‌ده‌ستانی کۆماری ئیسلامی زیندوو کراوه‌ته‌وه‌ و ساڵیانێکه‌ که‌ له‌ ئێران به‌ کار ده‌برێ. له‌ به‌رابه‌ر ئه‌م ڕه‌وشه‌ بێڕه‌حمانه‌ و دژی ژن و دژی مرۆڤایه‌تیه‌وه‌ چ له‌ ناو ئێران و چ له‌ ده‌ره‌وه‌ی ئه‌م ووڵاته‌ به‌رده‌وام ناڕه‌زایی ده‌بڕاوه‌ و به‌ توندی مه‌حکوم کراوه‌.

له‌م دواییانه‌دا حه‌ول و تێکۆشانێکی تازه‌ له دژی بڕیاری سه‌نگساری ئه‌م 11 که‌سه ده‌ستی پێ کردوه‌، ڕێکخراوی مافی ژنی کورد، مافی مرۆڤ پشتیوانی ته‌واوی خۆی له‌م که‌مپه‌ینه‌ ڕاده‌گه‌یه‌نێ و داوا له‌ هه‌مو ژنان و پیاوانی کوردستان ده‌کا که‌ به‌ هه‌ر جۆرێک که‌ له‌ ده‌ستیان دێ له‌ دژی بڕیاری سه‌نگسار ڕاوه‌ستن‌ و نه‌یه‌ڵن که‌ کۆماری ئیسلامی به‌م جۆره‌ بێ به‌زه‌ییانه‌ ده‌ست بداته‌ کوشتنی خه‌ڵک.

کۆماری ئیسلامی ئێران خۆی تاوانباری ئه‌سڵیه‌ و ده‌بێ به‌ جورمی ئه‌و هه‌مو تاوانه‌ی که‌ دژ به‌ خه‌ڵکی ئێران به‌ گشتی و دژ به‌ ژنانی ئێرانی به‌ تایبه‌تی کردویه‌تی بخرێته‌ به‌رده‌م دادگاوه‌.

ڕیکخراوی مافی ژنی کورد، مافی مرۆڤ

2006-11-07